Um okkur

Í ágúst 2004 bauð Eygló Björnsdóttir hópi fólks í lundaveislu á sveitasetri sínu á Hauganesi í Eyjafirði. Tilefnið var að 10 ár voru þá liðin síðan starfsfólk Barnaskóla Akureyrar heimsótti hana til Vestmannaeyja. Í Sandvík húsi Eyglóar og Friðriks er mikið af föndri og handavinnu eftir Eygló. Fjórar af gestunum urðu yfir sig hrifnar og tóku loforð af Eygló um að kenna brúðugerð. Þá strax var ákveðið að við myndum hittast að nokkrum vikum liðnum. Þannig atvikaðist það að við fórum að hittast og föndra saman. Síðan höfum við Sandvíkurpæjurnar hist nokkurn veginn mánaðarlega yfir veturinn. Klúbburinn okkar er ekki hefðbundinn saumaklúbbur heldur föndur-vinnuklúbbur og þar sem við erum einstaklega vinnusamar á fundum þá förum við í vinnuklúbbinn en ekki saumaklúbb.

Við urðum að finna þægilegt nafn á klúbbinn og varð nafnið "Pysjurnar" ofan á.

Í klúbbnum gilda nokkrar reglur: Veitingar eru á boðstólum, en bannað að hafa fyrir, og mest mega vera tvær sortir því oft er varla tími til að njóta þeirra vegna anna í klúbbnum. Oft eru ákveðin verkefni tekin fyrir og skapast þá mikil stemning þegar við erum allar að búa til samskonar jólasveina, kransa, brúður eða læra pappíssaum (Paper Piece). 

Haust 2012. Þessar áherslur hafa breyst nokkuð. Veitingar hafa orðið meiri, klúbbarnir lengst, meira spjallað og minna um bútasaum en því meira um prjón og hekl. Nú orðið er það aðallega Þorgerður sem setur inn myndir af verkum sínum, hinar eru svo hæverskar en vonandi taka þær myndir af öllu sem þær gera því það er ekki lítið. Eftir að Þorgerður var á Löngumýri haustið 2011 fór hún að sauma með hópi kvenna á Akureyri sem hittist af og til á laugardögum í Norðurorku, hópurinn kallar sig Orkulísurnar. Á síðunni eru myndir frá nokkrum af þeim skiptum.

Allar búum við á Akureyri en vinnum núna á mismunandi stöðum. Við erum:

Ásdís Þorvaldsdóttir 

Eygló Björnsdóttir 

Friðbjörg Hallgrímsdóttir bættist við 2012 

Rósbjörg Jónsdóttir 

Svanhildur Daníelsdóttir

Þorgerður Sigurðardóttir togga (hjá) simnet.is

Haustið 2016 þá hefur Þorgerður farið niu sinnum á Löngumýri. Svana hefur farið þrisvar, Ásdís tvisvar og Rósa tvisvar. Í nóvember 2007 höfðum við saumalaugardag heima hjá einni okkar og annan í lok febrúar 2008.